Feeds:
Beiträge
Kommentare

Am Fritigobig isch dä Erlebnis-Parcours und d’Gartäalag mit emenä Apero fiirlich igweiht wordä. Dä Direktor Ueli Vögeli und dä SFK-Projektleiter Christian Schönbächler händ ä Red ghaltä und nach enerä chlinä Verpflegig isch äs uf dä Rundgang gangä. d’Sponsorä, d’Gönner und d’Mitglieder vo dä Druidä-Gilde händ d’Werk vo dä Bautäg chönä betrachtä.

s’Wuchänänd isch ganz im Zeichä vom Familiä-Tag gstandä. Am Samschtig isch alles ufbuut und igrichtet wordä, damit äs am Sunntig hett chönä losgoh. Ab dä 11i am Morgä sind d’Lüüt itrudlet und innert kürzeschter Ziit isch d’Strohburg, d’Tretitraktorä, Streichelzoo, Fotoshooting und Festwirtschaft vo dä Bsuächer ignoh wordä. Obwohl z’Wetter bewölkt und chalt gsi isch, händ zahlrichi Familiä dä Weg nach Wülflingä gfundä.

Ab em 5i isch diä ganz Aalag innerhalb vo 2 Stund verrumet gsi. Zum Abschluss vom Tag händ mir üs das ganzä Projekt i dä Bar Revue passierä lo und händ dä Abig usgehend gfiiret 🙂

Ich dankä all minä Kollege/innä für diä toll Zämäarbet i dä letschtä paar Tag und bin stolz uf das, was mir z’stand brocht händ. Merci vielmol!!!

Werbeanzeigen

Letzte Etappe

Dä Numitag isch ganz im Zeichä vo dä Arbetsbeendigung und Ufrumarbetä gsi. Däzuä herä isch s’Wetter au immer besser wordä und mir händ sogar Sunnä gha. d’Spannig uf dä Eröffnigsapero wird immer grösser und alli freuts riesig, z’ganzi Projekt dörfä izweihä.

Hüt am halbi 7ni hett dä Güggel i dä Turnhallä dä 2. Tag vom SFK-Projekt luthals gstartet. Nach emene richhaltigä z’Morgä isch es pünktlich am 8i wieder a d’Arbet gangä. d’Gartäalag und dä Erlebnis-Parcours sind i dä letschtä Ufbauetappenä und d’Motivation isch bi allnä immer no vorhandä.

Damit d’Bevölkerig au öppis mit bechunnt vo dänä zwei tolle Täg, isch geschter wacker a d’Zitigä telefoniert wordä. D’Begeisterig bi dä einzelne Journalistä isch vorhandä gsi und hüt Morgä hämmer scho än erschts Erfolgserlebnis dörfä fiirä. I dä 20 Minutä isch än Artikel übers SFK-Projekt cho!!!

2. Etappe geschafft

Am Numitag isch äs im glich schnellä Tempo wiä am Morgä wiiter gangä. D’Arbetä sind suuber und gwüssävoll usgfüährt wordä. Bis zum z’Vieri sind scho d’Chrüterschneck, d’Fässer und einzelni Zimmer fertig gstellt gsi. Dank enerä sehr guätä Zämäarbet zwüschä dä Agrotechniker und Hofmitarbeiter simmer hüt wiiter cho als planet. Us dem Grund hämmer hüt früäner ufghört und Hofmitarbeiter luäget bis zum z’Nachtessä än Film. Z’Abigprogramm stoht ganz im Zeichä vom Lotto. Mol luägä, wer dä Millionä-Jackpot knackt.

1. Etappe geschafft

Dä erschti Morgä vom SFK-Projekt hämmer scho hinder üs brocht. D’Löcher sind usghobä, Pföhl für dä Erlebnsi-Parcours werdet igschlagä und i dä Gartäalag nehmet diä einzelne Bereich langsamg Gstalt a. Trotz em Wetter goht d’Arbet vorwärts und mir sind guät im Ziitplan. Bim Znüni und z’Mittag simmer vom Chuchiteam Wülflingä richtig verwöhnt wordä. Nach dä Mittagspausä sind alii wieder mit vollem Elan a d’Arbet gangä.

Hüt am halbi 9ni sind d’Hofmitarbeiter  langsam itrudlet und händ Namesschilder sowie Strickhof-Chäppli gfasset. Nach dä Gruppäiteilig isch äs a d’Arbeit gangä. Trotz äm schlechtä Wetter sind alli motiviert und freued sich uf diä nöchschtä 2 Täg.

Nach dä suuberä Vorarbet vo geschter, hend hüt d’Wägli chönnä mit Kies gfüllt werdä. Dä Transport vom Kies isch anhand em Traktor und Wagä passiert. Mit Bagger, ä Motorgarettä und Schuuflä isch s’Kies i dä Gartäalag vo flissigä Agrotechniker verteilt wordä. Für d’Verdichtig vo dä Wägli isch d’Vibroplattä zuäständig gsi, damit dä Juramergel ä guäts Fundament hett. Nach äs paar Stund und ungefähr 25 Kubik Kies sind alli Wägli sowie Erholigsnischenä i dä Gartäalag fundiert. Zum Abschluss vom Tag sind no äs paar grossi Stei verleit wordä und dä 1. Meilästei vom SFK-Projekt i dä Bauphasä isch erreicht.

Diä nöchschtä Arbetä werdet am nöchschtä Dunschtig, 11.03.2010, vo Teams us Agrotechniker und Hofmitarbeiter erledigt.